Read the Bible

¹ Verder het Elíhu aangehef en gesê:² Hou u dit vir reg, noem u dit: my geregtigheid voor God,³ dat u vra wat dit u baat? Wat help dit my meer as wanneer ek sou sondig?⁴ Ék sal u antwoord gee en aan u vriende saam met u.⁵ Kyk op na die hemel en sien, en aanskou die wolke wat hoog bo u is.⁶ As u sondig, watter skade is dit vir Hom? En is u oortredinge baie, wat kan u Hom daarmee aandoen?⁷ As u regverdig is, wat gee u aan Hom? Of wat kan Hy uit u hand aanneem?⁸ U goddeloosheid raak net 'n mens soos u, en u geregtigheid 'n mensekind.

⁹ Vanweë die menigte van verdrukkinge skreeu hulle; hulle roep om hulp oor die geweld van die grotes.¹⁰ Maar niemand sê nie: Waar is God, my Maker, wat lofsange gee in die nag,¹¹ wat ons meer leer as aan die diere van die aarde en ons wyser maak as die voëls van die hemel?¹² Dan roep hulle, maar Hy antwoord nie, vanweë die trotsheid van die kwaaddoeners.¹³ Sekerlik, na nietige klagte luister God nie, en die Almagtige slaan daar geen ag op nie.

¹⁴ Hoeveel minder as u sê u sien Hom nie! Die regsaak is voor Hom: wag dan op Hom.¹⁵ Maar nou, omdat sy toorn nie straf nie, en Hy nie grootliks ag gee op oormoed nie,¹⁶ maak Job sy mond wyd oop in nietige gepraat, vermenigvuldig hy woorde sonder kennis.