Read the Bible

¹ The `title of the hundrid and sixe and fourtithe salm. Alleluya. Herie ye the Lord, for the salm is good; heriyng be myrie, and fair to oure God.<sup>2</sup> The Lord schal bilde Jerusalem; and schal gadere togidere the scateryngis of Israel.<sup>3</sup> Which Lord makith hool men contrit in herte; and byndith togidere the sorewes of hem.<sup>4</sup> Which noumbrith the multitude of sterris; and clepith names to alle tho.<sup>5</sup> Oure Lord is greet, and his vertu is greet; and of his wisdom is no noumbre.<sup>6</sup> The Lord takith vp mylde men; forsothe he makith low synneris `til to the erthe.⁷ Bifore synge ye to the Lord in knoulechyng; seye ye salm to oure God in an harpe.⁸ Which hilith heuene with cloudis; and makith redi reyn to the erthe. Which bryngith forth hei in hillis; and eerbe to the seruice of men.⁹ Which yyueth mete to her werk beestis; and to the briddys of crowis clepinge hym.¹⁰ He schal not haue wille in the strengthe of an hors; nether it schal be wel plesaunt to hym in the leggis of a man.¹¹ It is wel plesaunt to the Lord on men that dreden hym; and in hem that hopen on his mercy.

¹² Jerusalem, herie thou the Lord; Syon, herie thou thi God.¹³ For he hath coumfortid the lockis of thi yatis; he hath blessid thi sones in thee.¹⁴ Which hath set thi coostis pees; and fillith thee with the fatnesse of wheete.¹⁵ Which sendith out his speche to the erthe; his word renneth swiftli.¹⁶ Which yyueth snow as wolle; spredith abrood a cloude as aische.¹⁷ He sendith his cristal as mussels; who schal suffre bifore the face of his cooldnesse?¹⁸ He schal sende out his word, and schal melte tho; his spirit schal blowe, and watris schulen flowe.¹⁹ Which tellith his word to Jacob; and hise riytfulnessis and domes to Israel.²⁰ He dide not so to ech nacioun; and he schewide not hise domes to hem.