Read the Bible

¹ יהוה מלך ירגזו עמים ישב כרובים תנוט הארץ׃² יהוה בציון גדול ורם הוא על כל העמים׃³ יודו שמך גדול ונורא קדוש הוא׃⁴ ועז מלך משפט אהב אתה כוננת מישרים משפט וצדקה ביעקב אתה עשית׃⁵ רוממו יהוה אלהינו והשתחוו להדם רגליו קדוש הוא׃

⁶ משה ואהרן בכהניו ושמואל בקראי שמו קראים אל יהוה והוא יענם׃⁷ בעמוד ענן ידבר אליהם שמרו עדתיו וחק נתן למו׃⁸ יהוה אלהינו אתה עניתם אל נשא היית להם ונקם על עלילותם׃⁹ רוממו יהוה אלהינו והשתחוו להר קדשו כי קדוש יהוה אלהינו׃