Read the Bible

¹ Vir die musiekleier. Van die kinders van Korag. 'n Psalm. ² U het, o HERE, 'n welbehae gehad in u land; die lot van Jakob het U verander.³ U het die ongeregtigheid van u volk weggeneem, al hulle sonde bedek. Sela.⁴ U het al u grimmigheid teruggetrek, U het U van die gloed van u toorn afgewend.⁵ Herstel ons, o God van ons heil, en maak tot niet u grimmigheid teen ons!⁶ Sal U vir ewig teen ons toornig wees, u toorn laat duur van geslag tot geslag?⁷ Sal U ons nie weer lewend maak, sodat u volk in U bly kan wees nie?

⁸ Laat ons u goedertierenheid sien, o HERE, en gee ons u heil!⁹ Ek wil hoor wat God die HERE spreek. Ja, Hy spreek vrede vir sy volk en vir sy gunsgenote; maar laat hulle nie tot dwaasheid terugkeer nie!¹⁰ Gewis, sy heil is naby die wat Hom vrees, sodat heerlikheid in ons land kan woon.¹¹ Goedertierenheid en trou ontmoet mekaar; geregtigheid en vrede kus mekaar.¹² Trou spruit uit die aarde en geregtigheid kyk uit die hemel neer.¹³ Ook gee die HERE die goeie, en ons land lewer sy opbrings.

¹⁴ Geregtigheid gaan voor Hom uit, en dit let op die weg van sy voetstappe.