Read the Bible

¹ The title of the eiytenthe salm. To victorie, the salm of Dauid. Heuenes tellen out the glorie of God; and the firmament tellith the werkis of hise hondis.² The dai tellith out to the dai a word; and the nyyt schewith kunnyng to the nyyt.³ No langagis ben, nether wordis; of whiche the voices of hem ben not herd.⁴ The soun of hem yede out in to al erthe; and the wordis of hem `yeden out in to the endis of the world.⁵ In the sunne he hath set his tabernacle; and he as a spouse comynge forth of his chaumbre. He fulli ioyede, as a giaunt, to renne his weie;⁶ his goynge out was fro hiyeste heuene. And his goyng ayen was to the hiyeste therof; and noon is that hidith hym silf fro his heet.

⁷ The lawe of the Lord is with out wem, and conuertith soulis; the witnessyng of the Lord is feithful, and yyueth wisdom to litle children.⁸ The riytfulnessis of the Lord ben riytful, gladdynge hertis; the comaundement of the Lord is cleere, liytnynge iyen.⁹ The hooli drede of the Lord dwellith in to world of world; the domes of the Lord ben trewe, iustified in to hem silf.¹⁰ Desirable more than gold, and a stoon myche preciouse; and swettere than hony and honycoomb.¹¹ `Forwhi thi seruaunt kepith thoo; myche yeldyng is in tho to be kept.<sup>12</sup> Who vndurstondith trespassis? make thou me cleene fro my priuy synnes;<sup>13</sup> and of alien synnes spare thi seruaunt. `If the forseid defautis ben not, Lord, of me, than Y schal be with out wem; and Y schal be clensid of the mooste synne.¹⁴ And the spechis of my mouth schulen be, that tho plese; and the thenkynge of myn herte euere in thi siyt. Lord, myn helpere; and myn ayenbiere.