Read the Bible

¹ את הזקנים אשר בקרבכם אזהיר אנכי עמיתם הזקן ועד ענויי המשיח וגם חבר לכבוד העתיד להגלות׃² רעו את עדר האלהים אשר בידכם והשגיחו עליהם לא באנס כי אם בנדבה אף לא עקב בצע כי אם בנפש חפצה׃³ גם לא כמתעמרים בנחלת יהוה כי אם בהיותכם מופת לצאן׃⁴ והיה בהגלות שר הרעים תשאו עטרת הכבוד אשר לא תבל׃

⁵ וכן גם אתם הנערים הכנעו לפני הזקנים וחגרו כלכם שפלות רוח בהכנע איש לרעהו כי אלהים ללצים יליץ ולענוים יתן חן׃⁶ השפילו נפשכם תחת יד אלהים החזקה למען ירומם אתכם בעתו׃⁷ השליכו עליו כל יהבכם כי הוא ידאג לכם׃

⁸ התעוררו שקדו כי מריבכם השטן משוטט כאריה שאג ומבקש את אשר יבלע׃⁹ ועמדתם נגדו חזקים באמונה ודעו כי ענוים כאלה באו גם על אחיכם אשר בעולם׃

¹⁰ ואלהי כל החסד אשר קראנו לכבודו הנצחי במשיח ישוע אחרי ענותכם מעט הוא ישלים ויחזק ויגבר וייסד אתכם׃¹¹ לו הכבוד והעז לעולמי עולמים אמן׃¹² ביד סלונוס האח הנאמן לכם כאשר אחשב כתבתי אליכם בדברים מעטים להזהיר אתכם ולהעיד כי חסד האלהים הזה אשר עמדתם בו אמת הוא׃¹³ חברתכם אשר בבבל הנבחרה אתכם ומרקוס בני שאלים לשלומכם׃¹⁴ שאלו לשלום איש את רעהו בנשיקת אהבה שלום לכלכם אשר במשיח ישוע אמן׃