Read the Bible

¹ Custodi pedem tuum ingrediens domum Dei, et appropinqua ut audias. Multo enim melior est obedientia quam stultorum victimæ, qui nesciunt quid faciunt mali.

² Ne temere quid loquaris, neque cor tuum sit velox ad proferendum sermonem coram Deo. Deus enim in cælo, et tu super terram ; idcirco sint pauci sermones tui.³ Multas curas sequuntur somnia, et in multis sermonibus invenietur stultitia.⁴ Si quid vovisti Deo, ne moreris reddere : displicet enim ei infidelis et stulta promissio, sed quodcumque voveris redde :⁵ multoque melius est non vovere, quam post votum promissa non reddere.⁶ Ne dederis os tuum ut peccare facias carnem tuam, neque dicas coram angelo : Non est providentia : ne forte iratus Deus contra sermones tuos dissipet cuncta opera manuum tuarum.⁷ Ubi multa sunt somnia, plurimæ sunt vanitates, et sermones innumeri ; tu vero Deum time.⁸ Si videris calumnias egenorum, et violenta judicia, et subverti justitiam in provincia, non mireris super hoc negotio : quia excelso excelsior est alius, et super hos quoque eminentiores sunt alii ;

⁹ et insuper universæ terræ rex imperat servienti.¹⁰ Avarus non implebitur pecunia, et qui amat divitias fructum non capiet ex eis ; et hoc ergo vanitas.¹¹ Ubi multæ sunt opes, multi et qui comedunt eas. Et quid prodest possessori, nisi quod cernit divitias oculis suis ?¹² Dulcis est somnus operanti, sive parum sive multum comedat ; saturitas autem divitis non sinit eum dormire.¹³ Est et alia infirmitas pessima quam vidi sub sole : divitiæ conservatæ in malum domini sui.¹⁴ Pereunt enim in afflictione pessima : generavit filium qui in summa egestate erit.¹⁵ Sicut egressus est nudus de utero matris suæ, sic revertetur, et nihil auferet secum de labore suo.¹⁶ Miserabilis prorsus infirmitas : quomodo venit, sic revertetur. Quid ergo prodest ei quod laboravit in ventum ?